ព្រះវិហារ៖ អភិបាលខេត្តព្រះវិហារ លោក គីម រិទ្ធី បានស្នើដល់ប្រជាពលរដ្ឋ ជាពិសេសអ្នកដែលកំពុងរស់នៅតាមដងស្ទឹងសែន មាត់ទន្លេមេគង្គ និងបងប្អូនដែលកំពុងតែរស់នៅតាមតំបន់ងាយ រងគ្រោះដោយសារទឹកជំនន់មានការប្រុងប្រយ័ត្នក្រោយកម្រិតទឹកភ្លៀងបានបង្កជាជំនន់នៅក្នុងស្ទឹងសែនលើសកំរិតប្រកាសអាសន្នជាង ០,១០ម៉ែត្រ។
ក្នុងសេចក្ដីជូនដំណឹងចុះថ្ងៃសៅរ៍ ទី២៧ ខែសីហានេះ លោក គីម រិទ្ធី បានបញ្ជាក់ថាគិតត្រឹមថ្ងៃទី ១៧ ខែសីហា ឆ្នាំ២០២២នេះ ទឹកស្ទឹងសែនមានកម្ពស់ ១១,៦០ម៉ែត្រ លើសពីកម្រិតប្រកាសអាសន្ន ០,១០ម៉ែត្រ។ លោកថា មូលហេតុដែលបង្កឲ្យមានកម្រិតទឹកស្ទឹងឡើងបែបនេះបណ្ដាលមកពី ស្ថានភាពទឹកភ្លៀង ដែលធ្លាក់ក្នុងខេត្តពីកម្រិតពីមធ្យមទៅខ្លាំងជាប់ៗគ្នាក្នុងរយៈពេលប៉ុន្មានថ្ងៃជាប់គ្មា។
ដើម្បីធានាសុវត្ថិភាព និងបង្ការនូវគ្រោះមហន្តរាយជាយថាហេតុ លោកស្នើដល់ប្រជាពលរដ្ឋក្នុងខេត្តទាំងអស់ ជាពិសេសអ្នកដែលកំពុងរស់នៅតាមដងស្ទឹងសែន មាត់ទន្លេមេគង្គ និងអ្នកដែលកំពុងតែរស់នៅតាមតំបន់ងាយរងគ្រោះដោយសារទឹកជំនន់មួយចំនួន ប្រុងប្រយ័ត្នខ្ពស់ និងស្វែងរកទីទួលមានសុវត្ថិភាពដែលនៅជិត ចៀសវាងកើតមានឡើងនូវគ្រោះថ្នាក់ផ្សេងៗ។
ក្នុងករណីប្រជាពលរដ្ឋដែលជួបគ្រោះទឹកជំនន់ សូមរាយការណ៍ និងផ្តល់ព័ត៌មានឲ្យបានឆាប់បំផុតដល់អាជ្ញាធរ ភូមិ ឃុំ សង្កាត់ ក្រុង ស្រុក ខេត្តជាបន្ទាន់ ដើម្បីមាន លទ្ធភាពចាត់វិធានការដោះស្រាយ ការពារ និងសង្គ្រោះបានទាន់ពេលវេលា៕
